Campin’ wi’ pals

They ate their dinner and moved closer tae the camp fire. Then they sterted tellin’ tales aboot ghaists and hobgoblins and ither spookie things.

Twit Twoo!

Susie telt a real firchsome tale aboot a vampire that lived doon by Corbie Dykes. Ah, they a’ kent Corbie Dykes. It wisnae faur fae their hooses and, aye, it wis a spookie place.

Rosie telt wan aboot a ghaist that lived in the dark, dark wids and screeched a’ nicht. Shona thocht she wis jis’ gaun on aboot oolets. Shona scared the ithers when she said that ye shouldnae be feart o’ ghaists or vampires because they didnae exist. Whit did exist wis a band o’ wicked watter pixies and they were real, and they’d droon ye in yer sleep.

Robyn telt a horrid little tale aboot witches turnin’ boys intae puddocks. But that wis a’ richt. It wis whit maist boys deserved, especially big brithers.

Daisy insisted that the story she telt wis true. When she wis jist a bairn an’ had jist sterted tae talk, she wis pit tae bed. A wee while later a wee boy wis in her room. He said it yist tae be his room and when Daisy had asked whaur the boy had went, he said he didnae gang naewhaur. He wis deid.

Three o’ the lasses screamed wi’ fricht, but Shona noticed a wee glint in Daisy’s ee’n and a curl o’ a wee smile on her lips.

Well, afore they kent it, it wis time fur tae gang tae bed. For a wee while mair, they wis a’ chattering’ an’ natterin, but then they were a’ so tired, they sterted tae doze aff.

An’ that’s when the scary noises sterted. Somewhaur ootside there wis a screechin’ noise and a wailing noise.

Fower o’ the lasses thocht it wis ghaists, but Shona said it wis jis’ an oolet singin’ in the nicht, and the wind whistlin’ amang the rowans and the chessie trees.

But then there was a rustlin’ an’ a shufflin’, an’ a snortin’ noise jist ootside the tent. Shona wis the only wan that wisnae feart. She didnae believe in ghaists. She took her torch and poked her heid oot the tent fur a wee keek. It wis a badger, and it got mair o’ a fricht than Shona.

She pulled her heid back intae the tent an’ cries oot: “It’s the watter pixies.” Well, her fower pals screamed and didnae get a wink o’ sleep for the rest o’ the nicht.

The Scottish Midge!

Shona curled up and went tae sleep whaur she hid a great dream aboot sailin’ a boat on Loch Ness an’ screamin’ blue mirder at the giant midges.

On Monday, it wis Shona wha said tae her pals: “By here, yon campin’ wis loads o’ fun. Let’s dae it again this Seterday.”

But a’ her pals said: “Nae fear. We’re by wi’ the campin’.”